LAOAG CITY – Inpanamnama ni Mayor James Bryan Alcid a maikkan ti temporario a silaw iti bypass road ditoy siudad ti Laoag iti mabiit.
Segun kenkuana, saan a mabalin nga iyalokaranda ti pundo para iti daytoy gapu ta saan met a sakup ti lokal a gobierno ditoy siudad ti Laoag.
Nupay kasta, inpasingkedna nga isuda pay laeng ti mangikabil ti temporario a silaw ti bypass road.
Mainaig iti daytoy, inpasiguradona ti ad-adu pay a pannakaestablisar ti solar lights dagiti nagduduma a lugar ditoy siudad ti Laoag kas iti Rizal Street ken Bacarra Road pakairamanan iti airport road.
Inlawlawagna a saan pay a sakup ti lokal a gobierno iti airport road ngem adda ti pannakisaritana iti mangidadaulo iti Department of Public Works and Highways – First District Engineering Office nga isuda pay laeng ti mangpundo.
Kunana nga adda pay ti pannaka-survey dagiti dadduma a mabalin a pakaestablisaran dagiti solar lights.
Innayonna a bassit ti budget a naiyalokar iti benneg ti imprastraktura isut gapuna a masapul a tingitingen a naimbag ti pakausaran dagitoy.
