LAOAG CITY – Dakkel a tulong para kadagiti atleta ditoy siudad ti Laoag ti panangipaay ti Laoag City General Hospital ti Alisto Atletang Laoagueño – Sports Rehabilitation and Strength and Conditioning Program.
Daytoy ket maysa nga addang dagiti LCGH Physical Therapists a kalikagumda iti panangisagana kadagiti atleta ditoy siudad ti Laoag para iti mapaspasangasangan a Region 1 Athletic Association (R1AA) Meet.
Inbatad ni Dr. Marsha Lou Wapan, mangidadaulo ti Laoag City General Hospital, daytoy a ganuat ket mangipasigurado a maipaayan dagiti atleta ditoy siudad iti professional sports rehabilitation and conditioning support, partikular iti areas of injury assessment and prevention, on-site rehabilitation, recovery management and overall physical conditioning iti intero a panawen a panagsanayda ken kabayatan ti kompetision.
Inlawlawagna nga itampok daytoy nga addang ti kinapateg ti sports medicine ken rehabilitation iti pannakataginayon ti salun-at ken competitive readiness dagiti atleta a mangibagi iti siudad ti Laoag.
Innayonna a ti Laoag City General Hospital ket saan laeng a mangipapaay ti serbisio iti panangtaripato iti salun-at no diket katulungan pay iti panagdur-as ti komunidad, pannakapabileg dagiti agtutubo ken kinasayaat ti sports para kadagiti umili ditoy siudad ti Laoag.
