LAOAG CITY – Maobligar dagiti kompania ti langis nga agbalin a transparent iti panangipangato ti presio kadagiti produkto a petrolyo.
Daytoy ti inpaganetget ni Senador Erwin Tulfo a co-author ti Senate Bill 641 a gagem a mangipatungpal ti naiget a transparency iti Philippine Downstream Oil Industry.
Inbatadna a naruay nga umili ti immasideg kenkuana ken indanonda ti arungaingda a premature hike iti presio ti langis ken adda ti sumagmamano a gas stations ti nangibaga nga awanen ti suplay nga arig agur-uray laeng ti mega price hike iti petrolyo.
Iti babaen ti gakat, ibilin ti Department of Energy (DOE) kadagiti amin nga oil companies ti panangisubmitir ti “actual cost component” wenno ti pudno a detalye ti gastosenda iti kada litro ti petrolyo sakbay a mangideklarar ti nayon a presio.
Aramiden nga “automatic” ti panangisubmitir iti daytoy no ti average price ti Dubai crude oil ket immabot iti naikeddeng a presio basar iti Mean of Platts Singapore (MOPS).
Inpetteng ti agpanpanday linteg a nasken nga isardengen ti arig panaggundaway ti sumagmamano nga oil companies kadagiti external events ken ipasa met ti nayon a presio kadagiti consumers.
