LAOAG CITY – Inpasan ti Senate Blue Ribbon Committee iti Office of the Ombudsman ti imbestigasion kadagiti maipagarup nga anomalya iti flood control projects.
Gagem daytoy a mapaalisto ti imbestigasion ken maliklikan ti panagdoble kadagiti iwaywayat a proseso.
Inbatad ni Blue Ribbon Committee Chairman Senador Erwin Tulfo a napagsaritaanda ken ni Senate President Sherwin Gatchalian ken Ombudsman Jesus Crispin Remulla a ti Ombudsman a laengen ti mangidaulo kadagiti maipapan nga adda ti pakainaganna iti flood control projects.
Nagtaripnong ti tallo iti opisina ti Ombudsman idiay Quezon City.
Kuna ni Tulfo a nangrugi metten nga usaren ti Ombudsman dagiti dokumento nga insubmitir ti Independent Commission for Infrastructure.
Karaman kadagiti im-imbestigaran ti sumagmamano a kongresista, contractors, government officials, sumagmamano a Senador ken dadduma a nangangato nga opisial ti gobierno.
Inlawlawagna nga agtultuloy ti panagtaray ti imbestigasion ti Ombudsman.
Gapu iti daytoy, inpettengna a saanen a kasapulan pay a makibiang ti Blue Ribbon Committee iti nasao a banag tapno saan a maitantan ken maapektaran ti proseso ti imbestigasion.
