LAOAG CITY – Napateg para ken ni Presidente Ferdinand Marcos Jr. ti panagturong na a personal kadagiti cash distribution sites tapno ipakita iti publiko a ti gobierno ket agtrabtrabaho.
Sungbat daytoy ni Palace press officer Claire Castro kalpasan a nasaludsud no apay nga adda dagiti sumagmamano a pulitiko, pakairamanan ti Chief Executive a napalubusan a bimmisita iti cash aid distribution site iti napalabas a lawas, no sadinno a naibunong ti P5,000 cash aid para kadagiti tricycle drivers iti Manila.
Iti babaen ti General Appropriations Act of 2026, mapawilan dagiti pulitiko nga agidisplay ti aniaman a ladawan wenno dadduma a materyakes iti aid distribution sites.
Inpetteng ni Castro a daytoy ket aktibidad ni Presidente Marcos isut gapuna nga awan ti dakesna no ipakita na iti publiko nga aggungunay ti gobierno.
Inkalintegan pay ti Malacañang ni Manila Mayor Isko Moreno Domagoso ken Metro Manila Council President Francis Zamora iti kaadda da iti nasao nga aktibidad.
Inpalgak ni Castro nga iti Manila a naisayangkat ti aktibidad isut gapuna a rumbeng laeng a ni Mayor Isko Moreno ti nangsabat ken ni Presidente Marcos Jr.
Innayon na a no maipapan met ken ni Mayor Francis Zamora, isuna ti National President of the League of Cities a mangibagbagi kadagiti city mayors, kayatna a sawen gapu ta proyekoto daytoy ti presidente para kadagiti tricycle drivers no sadinno a ti lokal a gobierno mismo ti makaammo no siasinno dagiti benepisyaryo, rumbeng laeng nga agturong ni Mayor Francis Zamora.
