LAOAG CITY – Gutgutiguten ni Sen. Imee Marcos ti Social Security System (SSS), Government Service Insurance System (GSIS), PAG-IBIG, ken Philippine Health Insurance Corp. (PhilHealth) nga ipatungpal ti temporaryo a pannakasuspenso ti pannakai-deduct ti sweldo tapno kompleto ti maawat a sweldo dagiti mangmangged ken makissayan ti padagsen kadakuada gapu iti agtultuloy a panagngato ti presyo ti gasolina ken dagiti kangrunaan a magatgatang.
Kagiddan iti daytoy, ilunglungalong pay ti senador ti loan moratorium tapno malag-anan dagiti mangmangged, mannalon, mangngalap ken babassit a negosyante a kangrunaan nga apektado ti krisis iti enerhiya, kalpasan nga indeklarar ni Presidente Ferdinand Marcos Jr. ti national state of energy emergency.
Segun ken ni Marcos, ti krisis iti gasolina ken krudo ket padagsen aglalo iti inaldaw panagbiag ti kada Pilipino, kangrunaan na dagiti mangmangged.
Gapu iti daytoy, kuna ni Marcos a masapol a maikkan ti uray maysa laeng a bolan wenno nasursurok pay a pawayway iti panagbayad kadagiti obligasyon da.
Innayon ti senadora a ti nasao nga addang ket napaneknekanen idi panawen ti pandemya ken kadagiti napalabas a kalamidad.
