LAOAG CITY – Umaboten iti nasursurok ngem limapulo dagiti interesado a gumatang para iti Phase 1 ti Adigi Housing Project a masarakan iti Barangay 15 Baligat iti siudad ti Batac.
Segun ken ni Mrs. Evalaudia Duyor, Provincial Assessor ti Provincial Government of Ilocos Norte, adda pay ti 60 a lote ken balay a nakasagana a mailako tapno makumpleto ti proyekto.
Inbatadna a magagaranen dagiti maseknan nga agaplikar rason a planoda nga irugin ti agpaaplikar agsipud ta adda met ti nakasagana a pundo para iti 10 nga units.
Kabayatanna, kunana nga iti Phase 2, addan ti nakapatakder a 23 nga units ti duplex.
Inlawlawagna nga agduduma laeng ti “stages” dagitoy, adda ti maipatpatakder pay laeng, addan ti nalpas ti atepna ken sabali dagiti nalpas ti didingna.
Nupay kasta, inpakaammona a ti “model house” ket dandanin malpas agsipud ta naituding a ti puntiria a pannakaisayangkat ti “launching” ket iti maudi a lawas ti agdama a bulan ti Marso.
Inlawlawagna a naitantan bassit agsipud iti kaadda dagiti timmaud a problema mainaig iti “building permit.”
Iti baet daytoy, inpasingkedna a manarimaanen ti pannakaiprosesona ken namnamaenna a maituloy ti “launching” iti masungad a bulan ti Abril.
Innayonna nga iti agdama ket adda metten ti 41 a nagpareserba a pakairamanan ti maysa nga opisial ti probinsia.
