LAOAG CITY – Nakumpiskar ti sumurok 200 a bala ti paltog iti Ninoy Aquino International Airport terminals ken dadduma pay nga eropuerto ditoy pagilian ita a Semana Santa.
Basar iti Office for Transportation Security (OTS), sumurok 100 kadagitoy ti naala manipud kadagiti pasahero iti Ninoy Aquino International Airport.
Kabayatanna, 65 a pedaso ti live ammunition ti nakumpiskar iti maysa a babai a pasahero iti Puerto Princesa Airport idiay Palawan.
Segun iti Office for Transportation Security, kaadoan kadagiti pasahero a makumkumpiskaran ti bala ket ibagbagada nga ar-aramidenda laeng daytoy nga anting-anting.
Irekrekord laeng ti Office for Transportation Security dagiti makumkumpiskar a bala ken kalpasan ti maiyannatop a proseso ket palpalubosanen nga agbiahe dagiti pasahero.
