LAOAG CITY – Iyasideg ti Department of Trade and Industry (DTI) iti serbisio kadagiti Micro, Small, and Medium Enterprises (MSME) babaen iti panangipasdek kadagiti Negosyo Center iti amin a siudad ken ili ditoy probinsia ti Ilocos Norte.
Segun ken Mrs. Amelia Galvez, mangidadaulo iti Department of Trade and Industry (DTI), addan 20 ti bilang ti Negosyo Center iti probinsia, bayat a tallo pay ti target a maipasdek iti uneg iti daytoy a tawen.
Kalpasan ti pannakaipasdek dagitoy, target ti Department of Trade and Industry (DTI) a maabot ti 100 porsiento a coverage iti probinsia tapno tunggal siudad ken ili iti probinsia ket adda bukodna a Negosyo Center.
Innayonna a daytoy ket babaen ti Republic Act No. 10644, masapul a maipasdek ti Negosyo Center iti amin a siudad ken ili tapno maiyasideg dagiti serbisio ti Department of Trade and Industry (DTI), nangruna kadagiti Micro, Small, and Medium Enterprises (MSME).
Mainaig iti daytoy, ti staff ti Negosyo Center ti mangtaming kadagiti kasapulan ken problema dagiti negosyante, tapno saanen a kasapulan a mapan pay dagiti Micro, Small, and Medium Enterprises (MSME) iti provincial office ti Department of Trade and Industry (DTI) para kadagiti serbisio a kasapulanda.
Kabayatanna, inlawlawag ni Ms. Galvez a ti Negosyo Center ket kasla “small DTI” iti tunggal ili wenno siudad, gapu ta iyasidegna dagiti serbisio ti ahensia iti komunidad, nangruna kadagiti Micro, Small, and Medium Enterprises (MSME).
