LAOAG CITY – Nakaruaren iti ospital ti nakamotorsiklo a karaman iti disgrasia iti Barangay Susugaen iti ili ti Pasuquin.
Daytoy ti inpakaammo ni P/Lt. Berylle Dacuddao, Deputy Chief of Police iti Pasuquin Municipal Police Station.
Mainaig iti daytoy, kunana nga awan pay ti pinal a panagsinnarita dagiti pamilia a karaman iti disgrasia.
Inbatadana a manamnama ti panagsinnarita dagitoy kadagiti sumarsaruno nga aldaw tapno maammoan no ania ti agbalin a desision ti pamilia ti biktima.
Maipalagip a natay ti driver ti kurong-kurong kalpasan a nasapgud ti nakamotorsiklo iti national highway ti Barangay Susugaen iti ili ti Pasuquin.
Ti biktima a driver ti kurong-kurong ket residente iti nasao a barangay idinto a ti nangiturong ti motorsiklo ket residente ditoy siudad ti Laoag.
Immuna iti daytoy, kabayatan a dumaldalyasat ti nakamotorsiklo nga agturong nga agpa-abagatan ket kellaat a nag-U-turn ti driver ti kurong-kurong nga agturong met iti kapada a direksion a nangitunda ti panagsinnapgudda.
Gapu iti daytoy, kunana a napukawan ti kontrol ti manibela ti driver ti kurong-kurong agingga a naidungpar iti sementado a poste.
Naitaray ti biktima iti kaasitgan nga ospital para iti naan-anay a pannakatamingna ngem naideklarar a dead on arrival babaen ti attending physician.
Inlawlawagna a napaspas ti taray ti nakamotorsiklo isut gapuna a saanna a naripar ti panag-U-turn ti sarsarunoenna a kurong-kurong.
