LAOAG CITY – Awan ti kasiguradoan no agtultuloy ti rollback iti presio dagiti produkto a petrolyo iti pagilian kalpasan ti big-time oil price rollback nga inpatungpal dagiti kompania ti langis ita a lawas.
Inlawlawag ni Energy Secretary Sharon Garin a ti kaudian a rollback ket gapu iti temporario a panagbaba ti presio ti langis iti world market kagiddan ti anunsio ti ceasefire iti nagbaetan ti Estados Unidos ken Iran.
Nupay kasta, kunana nga awan ti kasiguradoan nga agtultuloy ti rollback gapu ta agtultuloy latta ti tension iti Middle East.
Maipalagip nga epektibo idi Abril 14, nagkissay dagiti kompania ti langis ti minimum a P20.89 iti kada litro iti diesel, P4.43 iti gasolina ken P8.50 iti kerosene.
Inlawlawag ni Garin a dagiti rakurak ni United States President Donald Trump ket adda ti epekto met iti trading prices.
Mainaig iti daytoy, inpasigurado ti sekretario nga agtigtignay ti Department of Energy (DOE) tapno makaala ti nayon a suplay ti petroleum products iti babaen ti Philippine National Oil Company (PNOC).
