LAOAG CITY – Saan a lapped ti utang tapno saan a makamartsa iti graduation ti maysa nga estudyante.
Daytoy ti naipalaon iti House Bill 8618 nga inpila ni Paranaque Rep. Brian Yamsuan.
Iti babaen ti gakat ket maikkat ti kondisyon kadagiti pagadalan a “ban” ti estudyante iti graduation ceremonies no adda ti utang na iti pagadalan.
Inpetteng ni Yamsuan a karbengan dagiti agad-adal nga atendaran ti graduation rites da.
Sakopen ti nailungalong a gakat ti amin a public ken private basic education (K-12) schools, higher educational institutions ken technical-vocational institutions.
Naipalaon pay iti gakat a mabalin a tumulong ti Department of Social Welfare and Development iti panagbayad ti utang ti estudyante no ti kaawan ti pagbayad da ket gapu iti kalamidad, emergency ken force majeure.
Innayon na a tapno masigurado a makolektar dagiti pagadalan ti utang manipod kadagiti estudyante ket mabalin a saanda nga ited ti diploma ken dadduma pay nga academic documents agingga a saan a makabayad iti obligasyon.
