LAOAG CITY – Dakkel a makatulong ti panagusar ti solar-powered systems iti Local Government Unit iti ili ti Pinili iti baet ti oil crisis.
Segun ken ni Vice Mayor Maynard Francis Bumanglag iti nasao nga ili, nagbalin man a karit iti daytoy a krisis iti amin ngem saanda nga insakripisio ti tsansa a makapaglako dagiti umili babaen iti pannakaiyuswat ti fiesta dagitoy.
Inbatadna nga adu man dagiti banag a masapul ti panagin-inot ngem gapu ta kayatda a maparagsak ken matulungan dagiti Micro Small and Medium Enterprises ket intultuloyda latta ti panagfiesta.
Inlawlawagna a dakkel a tulong para kadakuada ti nasapa a pannakainstolar kadagiti solar panels iti amin a building-da tapno makakunsumo ti kuriente nangruna ita a fiestada.
Innayonna a babaen iti panagkaykaysada ket saan a nagbalin a tubeng ti krisis tapno ituloy ti pannakaisayangkat ti fiestada.
Immuna iti daytoy, adda ti sumagmamano nga ili ditoy probinsia a nagkanselar iti panagfiestada gapu iti krisis a sangsangoen iti pagilian gubuay iti gubat idiay Middle East.
