LAOAG CITY – Inrakurak ni United States President Donald Trump a tinamaan ti United States Navy destroyer-da ti maysa nga Iranian-flagged cargo ship a maipagarup a nanggandat a mangliklik iti naval blockade ti Estados Unidos iti Gulf of Oman.
Iti post-na iti Truth Social, inbatad ni Trump a binallaagan pay laeng nga umuna ti United States Navy ti barko nga agsardeng ngem saan a nagtungpal.
Gapu iti daytoy, napilitan nga agpaputok ti guided missile destroyer nga USS Spruance iti nasao a cargo ship isut gapuna a timmama iti engine room daytoy.
Ti insidente ket kagiddan ti akusasion ni Trump a linabsing ti Iran ti ceasefire agreement kalpasan ti maipagarup a panagpaputok daytoy iti Strait of Hormuz.
Kabayatanna, inpetteng met ti Iran a naminsan manen a napaserraan ti nasao a ruta pangbaybay para iti kaadoan a barko ken inakusaranna ti Estados Unidos ti panaglabsing iti talek iti nagbaetan ti dua a pagilian.
Maipalagip a pinaserraan manen ti Iran ti Strait of Hormuz kadagiti amin a cargo-ship gapu iti maipagarup a panaglabsing ti Amerika iti katulaganda.
