LAOAG CITY – Nagpalagip ti Provincial Health Office nga idadauloan ni Dr. Rickson Balalio kadagiti umili ken kadagiti turista nga agturong kadagiti resorts ken aniaman a pagpasiaran ditoy probinsia.
Inbatadna a no mabalin ket saan unay nga aginom ti arak no mapan kadagiti resorts gapu ta mabalin a mangitunda daytoy ti pannakalmes.
Malaksid iti daytoy, kunana a masapul nga agtalinaed nga hydrated ken mapan kadagiti nalinong a lugar tapno maliklikan ti saan a napintas nga epekto ti kinabara ti panawen.
Inpakaammona a ti panagbaliw ti panawen kas ti kinapudot ti aldaw ken kinalamiis ti rabii ket mabalin a makaitunda ti uyek ken panateng.
Innayonna a masapul nga uminom ti adu a danum ken panangtagiben ti bagi para iti napigpigsa nga immune system.
