LAOAG CITY – Inaprobaran ti Sandiganbayan ti Office of the Ombudsman a mangiparuk-at ti preliminary hold departure order (PHDO) kontra ken ni dati nga House Speaker Martin Romualdez.
Kinumpirmaran ti Bureau of Immigration (BI) a nangiparuk-at ti pammilin ti anti-graft court’s Seventh Division mainaig iti daytoy.
Inbatad ni Immigration spokesperson Dana Sandoval, naawatdan ti order ken inramandan iti system-da.
Rumrummuar nga inparuk-at ti pammilin maysa nga aldaw kalpasan a nagkiddaw ni Ombudsman Jesus Crispin Remulla ti travel restriction mainaig iti plano a panagbiahe ni Romualdez nga agturong idiay Singapore para iti maysa a medical procedure.
Basar iti request ti Ombudsman, inbatadna nga implicated ni Romualdez iti kaso a plunder, direct bribery, panaglabsing iti Sections 3(a) and 3(b) of Republic Act No. 3019, indirect bribery and money laundering.
Maipalagip nga idi Abril 20, inaprobaran ti Kamara de Representantes ti kiddaw ni Romualdez nga agturong idiay Singapore a naikeddeng koma idi Abril 20 agingga Mayo 4.
Namunganay ti alegasion iti maipagarup a kickback scheme nga adda ti pakainaiganna kadagiti maanomalya a flood control projects.
Kabayatanna, plano a kwestionaren ti kampo ni Romualdez ti inyisyu a preliminary hold departure order ti Sandiganbayan gapu ta awan met ti kaso a naipila kontra iti dati nga House Speaker.
