LAOAG CITY – Inkari ti state witness a ni dati a Department of Public Works and Highways (DPWH) Undersecretary Roberto Bernardo nga isublina ti pakabuklan a P1 billion iti gobierno.
Daytoy ket kas paset ti restitution kasukat iti panagserrekna iti Witness Protection Program (WPP) tapno agtestigo kadagiti anomalya iti flood control projects.
Immunan a nakaisubli ni Bernardo ti sumurok P500 million iti gobierno.
Iti panagtestigona iti bail hearing da dati a Senador Ramon Revilla Jr. ken ti padana nga akusado iti kaso a malversation iti Sandiganbayan, inadmitir ti dati a Department of Public Works and Highways official ti papelna iti maipagarup a korapsion kadagiti proyekto pakairamanan idiay Pandi, Bulacan ken kunana agbabbabawi isuna iti pannakairamanna iti sistema.
Nagtestigo met ni Bernardo iti tallo a maipagarup a minilyon a cash deliveries ken ni dati a Senador Revilla idi 2024 ken 2025.
Dinakamat ni Bernardo a maipagarup a nagkiddaw ni Revilla ti 25% a commitment para iti infrastructure projects pakairamanan ti maipagarup a ghost flood control project idiay Pandi, Bulacan.
Innayonna a binagaan isuna ti dati a Senador a makikoordinar kada dati a Department of Public Works and Highways Secretary Manuel Bonoan ken ti pimmusay a dati a Department of Public Works and Highways USec. Catalina Cabral a mairaman iti 2025 General Appropriations Act (GAA) ti proyekto idiay Pandi, Bulacan.
