LAOAG CITY – Napilitan nga insardeng ti Swiss International Air Lines ti panag-takeoff ti maysa nga eroplano manipod iti Delhi nga agturong iti Zurich kalpasan a naaddaan ti problema iti makina.
Basar iti airline, uppat a pasahero ken maysa a crew member ti nasugatan iti insidente.
Iti report dagiti otoridad, maysa kadagiti maipagarop a makina ti eroplano ket immapoy kabayatan a pumarpatak daytoy iti runway, a nangitunda ti dagus a pannaka-kanselar ti panagtayab na ken dagus a nangisyangkat ti emergency evacuation.
Ti nasao nga eroplano a maysa nga Airbus A330 ket addaan ti 228 a pasahero, karaman ti uppat a maladaga ken 13 a crew members.
Temporaryo met a nangideklarar ti emergency ti Indira Ghandi International Airport kalpasan ti insidente ngem iti saan a nagbayag ket nagsubli metlaeng iti normal ti operasyon ti runway.
Kabayatanna, naitaray iti ospital dagiti nasugatan a pasahero, idinto a nagsagaba met ti sprained ankle ti crew member.
Iti agdama, mangiyus-uswat ti imbestigasyon ti Swiss International iti babaen ti nabukel a task force tapno amwen ti makaigapu ti engine issue.
