LAOAG CITY – Inpakaammo ni Bombo International News Correspondent Rene Ballenas manipud idiay Estados Unidos a saan pay a masinunuo ti United States Secret Service no ni United States President Donald Trump ti target ti suspek iti pammaltog.
Segun kenkuana, agtultuloy pay laeng ti maiwaywayat a naun-uneg nga imbestigasion mainaig iti insidente tapno maduktalan ti pudno a motibo ti suspek.
Inbatadna a nabalkot ti amak ken buteng dagiti amin a tattao nga adda iti uneg ti hotel gapu kadagiti nagsasaruno a putok ti paltog.
Gapu iti daytoy, kuna ni Ballenas a temporario a nagserra ti hotel ngem kalpasan ti sumagmamano nga oras ket naglukat met laeng daytoy.
Inlawlawagna a daytoy ti umuna a gundaway a nagatendar ni Trump iti White House Correspondents’ Dinner sipud nagtugaw daytoy kas Presidente ti Amerika.
Innayonna nga inpangpangruna ti United States Secret Service ti kinatalged da United States President Trump ken United States Vice President JD Vance.
Maipalagip nga armado ti suspek a ni Cole Tomas Allen, agtawen ti 31 manipud idiay California no sadinno a ginandatna a labsan ti security checkpoint iti venue sakbay a nagpaputok ti paltog a nangitunda ti riribok ken alisto a panagibakwit kadagiti opisial ken bisita.
Immuna iti daytoy, insigida a naarestar ti suspek ken manamnama a mapilaan ti kaso pakairamanan ti posible a gandat a panangpapatay iti Presidente ken panangatake iti maysa a federal officer.
