LAOAG CITY – Temporario a naipasardeng ti libreng sakay ditoy probinsia.
Inlawlawag ni Gov. Cecilia Araneta Marcos a masapul a matingiting no itultuloy pay laeng wenno saan.
Inbatadna nga adda ti sumurok 30 a ribu nga umili dagiti nabenepisiaran, 12,590 a litro ti krudo ti naipaay ken 637 a ribu ti pakabuklan nga insentibo ti naipaay kadagiti jeepney drivers.
Kunana a manamnama ti pannakaipaay ti tulong manipud iti gobierno nasional.
Inpakaammo pay ni Gov. Marcos nga addan ti panagsinnaritada ken ni Department of Social Welfare and Development Sec. Rex Gatchalian no sadinno a dinawatda metten dagiti listaan.
Maipalagip a nangrugi ti libreng sakay idi Abril a mangalay-ay ti rigat a mapaspasaran dagiti driver ti jeep gapu iti panagngato ti presio ti produkto a petrolyo.
