LAOAG CITY – Inpasigurado ti Philippine Rural Electric Cooperatives Association (PHILRECA) ti kinasagana dagiti electric cooperative nga agsungbat iti pammilin a saan pay laeng a mangipatungpal ti disconnection kadagiti power consumer.
Daytoy ket kagiddan ti pammilin ti Energy Regulatory Commission (ERC) a temporario nga isardeng ti disconnection iti konsumo ti koriente manipud Mayo agingga Hunio.
Inbatad ni Philippine Rural Electric Cooperatives Association Executive Director Atty. Janeene Depay-Colingan a nakasagana dagiti electric cooperative iti intero a pagilian nga agsungbat iti baro a pammilin.
Kunana nga iti kinapudnona ket saanen a baro kadagiti electric cooperative ti kastoy a situasion gapu ta napasaran daytoy idi COVID-19 pandemic ken iti panawen ti dadduma pay a didigra.
