LAOAG CITY – Posible a marikna dagiti konsyumer inton Nobiembre ti kaltas iti singir manipud iti pannakaikkat ti 12% value-added tax (VAT) iti allowable system loss charges dagiti power utility.
Segun iti Energy Regulatory Commission (ERC), nakipagtaripnongdan kadagiti stakeholder idi Biernes tapno siguradoen dagiti mekanismo para iti pannakaipatungpal ti baro a pagalagadan ti Bureau of Internal Revenue (BIR).
Inbatad ni ERC Chairperson Francis Saturnino Juan a target-da a maipatungpal ti pannakaikkat ti VAT iti system loss charge para iti maususar a kuryente iti bulan ti Oktubre, a makita iti bill a maawat dagiti consumer inton bulan ti Nobiembre.
Iti salinong ti Revenue Memorandum Circular No. 97-2026 ti Bureau of Internal Revenue (BIR) a naiparuk-at idi Setiembre 14, saanen a mapatawan ti 12% VAT ti system loss charges iti limitasion nga inkeddeng ti Energy Regulatory Commission.
No man pay kasta, inlawlawag ti Energy Regulatory Commission (ERC) a value-added tax laeng iti system loss charge ti maikkat ken saan a ti mismo a system loss charge.
Kabayatanna, ti system loss charge ket mangibagbagi iti gastos mainaig iti kuryente a masaysayang bayat a maipatpatulod daytoy kadagiti power system, no sadinno ket saan a karaman daytoy kadagiti generation, transmission ken distribution charges a masansan a makita kadagiti electricity bill.
Mainaig iti daytoy, immunan a dinakamat ti Department of Energy (DOE) a mabalin a makainot ti saan a bumaba iti P20 iti electricity bill dagiti household a makaususar ti sumurok-kumurang 200 kilowatt-hours iti kada bulan no maipatungpal ti nasao a pannakabalbaliw.
