LAOAG CITY – Nangipaay ti komento ti maysa a Private Lawyer a ni Atty. Edito Alberto Balintona mainaig kadagiti nagsasaruno a napasamak iti lubong ti pulitika iti Kongreso ken Senado.
Segun kenkuana, makapakigtot ti kinaadu ti bilang dagiti kongresista a nagbutos a pabor iti impeachment ni Vice President Sara Duterte nga umabot iti 257.
Inbatadna a daytoy ket maysa a wagas tapno naan-anay a maiyuli ti Articles of Impeachment ti Bise Presidente iti Senado.
Inlawlawagna a mangipasimudaag daytoy a nadagsen ti akusasion a maibatbato kontra iti maikadua a kangatoan nga opisial ti pagilian.
Mainaig iti daytoy, inpakaammo ni Atty. Balintona a ti panagbalbaliw ti liderato ti Senado ket gapu iti mapaspasangasangan nga impeachment trial ni Vice President Sara a rumrummuar a lappedan ti Senado daytoy.
Nupay kasta, inpettengna a saan a mabalin nga aramiden daytoy dagiti Senador gapu ta responsibilidda nga insigida nga iwayat ti impeachment trial kas nailanad iti konstitusion.
Kabayatanna, kumanunong ni Atty. Balintona ti pannakaiserbi ti arrest warrant nga inparuk-at ti International Criminal Court kontra ken ni Sen. Ronald “Bato” Dela Rosa uray pay manarimaan ti pannakaisayangkat ti session iti Senado.
