LAOAG CITY – Kinumpirmaran ti United States Centers for Disease Control and Prevention nga awan ti kumpirmado a kaso ti Andes hantavirus idiay Estados Unidos mainaig iti outbreak iti luxury cruise ship nga MV Hondius a nakatayan ti tallo a pasahero.
Nupay kasta, inbatad ti United States health officials nga 41 nga indibidual ti imon-monitor gapu iti posible nga exposure iti virus pakairamanan ti 18 a naka-quarantine iti Nebraska ken Atlanta.
Basar iti Centers for Disease Control, karaman kadagiti maimon-monitor dagiti pasahero a nakasublin iti Estados Unidos sakbay pay a naduktalan ti outbreak kasta pay dagiti posible a na-expose kadagiti flight nga addaan ti symptomatic passengers.
Kuna ni Dr. David Fitter, incident manager ti Centers for Disease Control hantavirus response a kaadoan dagiti imon-monitor ket nabalakadan nga agtalinaed iti pagtaengan ken liklikan pay laeng ti pannakilangen-langen kabayatan a dumaldalan iti innem a lawas nga observation period.
