LAOAG CITY – Umaboten iti 13 a kaso ti Andes hantavirus ti nairekord pakairamanan ti tallo a natay.
Iti pakabuklan, 11 a kaso ti kumpirmado iti laboratorio ken dua ti maibilang a probable cases.
Daytoyen ti maikapat a report mainaig iti outbreak nga adda ti pakainaiganna iti cruise ship travel kalpasan nga inpakaammo iti World Health Organization (WHO) idi Mayo 2 dagiti kaso ti nakaro a respiratory illness iti barko nga M/V Hondius.
Maipalagip nga iti naudi a report idi Mayo 13, tallo a baro a kumpirmado a kaso ti naipadamag manipud iti Canada, Netherlands ken Spain.
Ti dati nga inconclusive case manipud iti Estados Unidos ket napaneknekan a negatibo ken inikkaten iti datos no sadinno nga amin a kaso ket manipud kadagiti pasahero wenno crew ti nasao a barko.
