LAOAG CITY – Saan a nagpakita iti imbestigasyon ti nasurok a 10 a personnel ti Senado a napaawagan mainaig iti napasamak a pammaltog iti uneg a mismo ti senate building idi rabii ti Mayo 13.
Immunan a naireport nga inserbi dagiti kameng ti Philippine National Police – Criminal Investigation and Detection Group (PNP-CIDG) dagiti subpoena kadagiti nasao nga staff idi malem ti martes, Mayo 19.
Kinumpirmaran met ni Criminal Investigation and Detection Group Director Major General Robert Alexander Morico II a nasurok a 10 nga empleado ti sakupen ti nasao a pammilin.
Nupay saan a nainaganan dagitoy, inbatad ni Morico a nangipatulod ti opisyal a surat kadagiti personnel tapno ilawlawag ti panaglangan da.
Kabayatanna, sumagmamano a miembro manipod iti Senate Office of the Sergeant-at-Arms (OSAA) ti immunan nga inbatad ti Philippine National Police a simmango iti Criminal Investigation and Detection Group, ngem inlawlawag ni Morico a saan a dimteng ni suspended acting Sergeant-at-Arms Mao Aplasca wenno siasinno man nga opisyal ti Senate Office of the Sergeant-at-Arms.
Iti pannakasaludsud no sumango iti maiyannatop a kaso dagiti saan a nagatendar, inrakurak ni Morico nga adalen pay ti Criminal Investigation and Detection Group ti sumaruno nga addang da mainaig iti daytoy.
