LAOAG CITY – Nalmes ti maysa a lalaki iti baybay iti Barangay Poblacion 1 iti ili ti Currimao.
Ti biktima ket agtawen ti 22, addaan ti live-in partner ken residente ti Barangay Poblacion 2 iti nasao met laeng nga ili.
Segun ken ni P/Cpt. Kester Arellano, Hepe ti Currimao Municipal Police Station, napan nagpana iti baybay ti biktima kaduana ti dua a lallaki no sadinno a kalpasan ti sumagmamano nga oras ket naripar ti dua a lallaki a saandan a kadua ti biktima.
Inbatadna nga inpagarup ti dua a lallaki a nagawiden ti biktima isut gapuna a saanda nga inkankano ti panagpukawna.
Inlawlawagna nga idi nakaawiden ti dua a lallaki kadagiti pagtaenganda ket naduktalanda a saan pay a nakaawid ti biktima.
Gapu iti daytoy, nagsubli ti dua a lallaki iti baybay tapno mangiwayat ti search and rescue operation no sadinno a nakitada ti bagi ti biktima nga awanen ti biagna.
Kabayatanna, inpakaammo ni Dr. Addielou Fidelfio Abad, Municipal Health Officer iti ili ti Currimao nga awan ti foul play a napasamak iti pannakatay ti biktima.
