LAOAG CITY – Natay ti driver ti tricycle kalpasan ti panagdinnungparda iti maysa a bus iti national highway iti Barangay Lang-Ayan iti ili ti Currimao.
Ti biktima a nangiturong ti tricycle nga Honda Black TMX 125 ket agtawen ti 36, naasawaan, vendor kaduana ti anakna nga agtawen ti 13, estudiante ken agpada dagitoy a residente ti Barangay San Mateo iti siudad ti Batac.
Ti driver ti Green Yutong Truck Bus ket agtawen ti 51, naasawaan, driver ken residente ti Barangay Quiom iti siudad ti Batac.
Segun ken ni P/Cpt. Kester Arellano, Hepe ti Currimao Municipal Police Station, kabayatan a dumaldalyasat ti tricycle nga agturong nga agpa-abagatan ket maipagarup a bimtak ti akin-sango a ligay daytoy isut gapuna a napukawan ti kontrol ti manibela.
Gapu iti daytoy, napan iti bangir a linya ti kalsada a nangitunda met ti panagdinnungparda iti sumungsungad a bus.
Inbatad ni P/Cpt. Arellano a gapu iti kinapigsa ti impact ti disgrasia ket naipurwak ti tricycle iti agarup 20 agingga 30 a metro manipud iti nakapasamakan ti disgrasia.
Kunana a nagsagaba ti nakana a sugat iti ulo ti driver ti tricycle ken natukkol ti sumagmamano a paset ti bagina a naideklarar a dead on the spot babaen iti attending physician a ni Dr. Addielou Fidelfio Abad, Municipal Health Officer iti ili ti Currimao ken nagsagaba met ti anakna ti sugat iti nagduduma a paset ti bagina a naitaray iti Mariano Marcos Memorial Hospital and Medical Center iti siudad ti Batac para iti pannakatamingna idinto a saan a naan-ano ti driver ti bus ken dagiti pasahero daytoy.
Innayonna nga agturong koma ti agama iti puestoda a karinderia iti ili ti Currimao idinto nga agturong koma met iti siudad ti Laoag nga aggapu idiay Manila ti bus idi napasamak ti disgrasia.
