LAOAG CITY – Inpannakkel ni Mayor James Bryan Alcid ti dakkel a nagbaliwan ti Laoag City Hall iti babaen ti administrasionna.
Segun kenkuana, inkagumaanna a matarimaan dagiti sumagmamano nga opisina a maperperdi dagiti bobedana tapno napinpintas met laeng ti kitana.
Inbatadna nga inpaurnosna pay dagiti silaw tapno ad-adda a nalawlawag dagiti opisina a mangakomodar kadagiti umili.
Inlawlawagna a planona a mapagbalin a Malacañang style ti Laoag City Auditorium inton sumaruno a tawen no sadinno nga amin a ladawan dagiti nagbalin a Mayor ken Bise Mayor pakairamanan dagiti konsehal ditoy siudad ti Laoag ket maikabil iti nasao nga auditorium tapno saan laeng a naka-tarpaulin dagitoy.
Innayonna a masapul pay nga ipakaammo kadagiti umili ti pakasaritaan ti siudad kas kadagiti naggapoan ti nagan dagiti barangay ken pammadayaw dagiti nagbalin nga opisial ditoy siudad a rumbeng laeng a maital-o.
