LAOAG CITY – Naglikudan ni Barangay Chairwoman Glenda Raquiño ti Barangay 34-A Gabu Norte ditoy siudad ti Laoag nga us-usarenna ti e-bike nga inpaay ti lokal a gobierno para iti personal a lakadna.
Daytoy ket kalpasan a ti nasao nga e-bike ket adda iti pagtaenganda pakairamanan dagiti dadduma pay a kagamitan ti barangay hall a manarimaan ti pannakatarimaanna.
Segun ken ni Kapitana Raquiño, saan a mabalin nga ibati dagiti kagamitanda iti barangay hall gapu ta agpukaw ken awan pay ti serrana isut gapuna a napagnunumoanda a maikabil pay laeng amin dagitoy iti pagtaenganda.
Inbatadna a naiget a mausar laeng ti e-bike para kadagiti opisial ti barangay nga adda ti napateg nga asikasoenna a dokumento a mapan iti sentro wenno City Hall.
Inlawlawagna a planoda nga opisial ti barangay ti mangipasdek ti storage room iti covered court tapno adda ti pangikabilan kadagiti kagamitan ti barangay hall nga imbes nga iti pagtaenganda.
Kunana a dagiti kagamitan ti barangay hall nga adda iti pagtaenganda ket dagiti tugtugaw ken dadakkel nga electric fan gapu ta awan ti espasyo iti barangay hall-da.
Innayonna nga adda ti maris pulitika ti mairekreklamo kenkuana gapu ta adda ti mapanpanunotna nga indibidual nga innagananna a ni Ms. Minerva Quitoriano nga akin-aramid iti daytoy.
Kabayatanna, naiget a naglikudan ni Ms. Quitoriano nga isuna ti adda iti likudan ti maibatbato a reklamo kontra ken ni Kapitana Raquiño.
Inadmitirna a nag-report idi isuna iti Department of the Interior and Local Government gapu iti maipagarup a saan a panangipaay ti resibo dagiti opisial ti barangay para iti barangay clearance ken low income pakairamanan ti panangkwestionarna no apay nga adda iti pagtaengan ti Kapitana dagiti tugtugaw ti barangay.
Inpettengna a nag-resign daytoy kas Barangay Service Point Officer iti barangayda ngem saannan nga inbuksilan ti rason daytoy.
Inpakaammona a dati nga agpagayamda iti Kapitana ngem gapu iti saanda a panagkinnaawatan ket naminpinsan a nagsina ti dana dagitoy.
