LAOAG CITY – Agsagsagana ti Provincial Government of Ilocos Norte (PGIN) ti possible nga epekto ti panawen ti panagtutudo iti turismo.
Inbatad ni Mr. Aian Raquel, ti Provincial Tourism Officer, daytoy ket nakadawayan da nga isaganaanen iti kada tawen.
Kunana a prayoridad da nga agbalin a natalged dagiti tourism site.
Inadmitirna pay nga kadagiti naglabas a tawen ket narigat ti agbalin a sitwasion da gapu ta napigsa dagiti bagyo ken alisto ti panagbaliw ti panawen.
Gapu iti daytoy, kunana a siguradwenda ti insigida a pannakaipaay ti tulong ken suporta kadagitoy kangrunaan no kalpasan ti bagyo.
Innayonna pay a naiget to suporta nga ipapaay ni Governor Cecilia Marcos kangrunaan iti benneg ti turismo rason a napintas ti koordinasion ti opisinada iti gobernadora.
Kabayatanna, inbatadna pay a kadaytoy a panawen ti panagtutudo ket isu ti pannaka-angay dagiti educational trip isu ti gapuna a naiget pay ti koordinasionda kadagiti pagadalan.
