LAOAG CITY – Inpetteng ni House Committee on Social Services Chairperson ken Davao Oriental Rep. Cheeno Almario a saan a pudno ti inrakurak ni Senador Erwin Tulfo a linappedan ti Kamara de Representantes ti panangikabil ti “Anti-Epal provisions” iti Assistance to Individuals in Crisis Situation wenno AICS Institutionalization Bill.
Inlawlawag ni Almario a ti pannakaitantan iti ratipikasion ti gakat ket gapu iti “technical effort” a gagem a siguradoen nga umno ken maipatungpal dagiti “wording” wenno dagiti sarita a mausar iti daytoy.
Inbatadna a ti Kamara de Representantes ket kabinnulig ti Senado isu a nasken a saan a laukan ti saan a panagkikinnaawatan ti panangikagumaanda nga agballigi a maipasa ti gakat.
Dinakamatna a ti Kamara de Representantes ket nakasagana isut gapuna nga al-allukoyenna ti Senado nga ipinaldan ti wording wenno dagiti sarita nga usaren iti gakat tapno naan-anay a mapagbalin a linteg.
Innayonna a ti Assistance to Individuals in Crisis Situation ken dadduma pay a klase ti ayuda ket nasken a saan nga usaren ti asinoman nga opisial para iti personal a promosyon, endorsement wenno political advantage.
