LAOAG CITY – Natay ti dua a nakamotorsiklo a menor de edad kalpasan a maipagarup a naglulumba iti paset ti Laoag-Suba-Paoay Road iti Barangay Balacad ditoy siudad ti Laoag.
Basar iti Laoag City Police Station, ti umuna a biktima a nangiturong ti Yamaha Mio ket maysa a lalaki nga agtawen ti 17, awanan asawa ken residente ti Barangay 40 Balatong ditoy siudad ti Laoag idinto a ti maikadua a biktima a nangiturong ti Suzuki Raider ket maysa a lalaki nga agtawen ti 17, awanan asawa ken residente ti Barangay 38-A, Mangato East ditoy siudad ti Laoag.
Iti inisyal nga imbestigasion, agpa-abagatan ti driver ti Yamaha Mio idinto nga agpa-amianan ti driver ti Suzuki Raider no sadinno nga apaman a nakadanonda iti nakapasamakan ti insidente ket immagaw iti linya ti kalsada ti driver ti Yamaha Mio a nangitunda ti panagdinnungparda iti sumungsungad a driver ti Suzuki Raider.
Gapu iti daytoy, nagsagaba ti sugat iti nagduduma a paset ti bagi ti dua a driver iti baet a nagusar dagitoy ti protective helmet.
Naitaray ti dua a biktima iti Governor Roque B. Ablan Sr. Memorial Hospital para iti naan-anay a pannakatamingda ngem naideklarar a dead on arrival babaen ti attending physician a ni Dr. Hency Thea Agngarayngay.
