LAOAG CITY – Inrakurak ni Senador Risa Hontiveros a seryoso daytoy nga ikonkonsiderarna ti panagtarayna kas Presidente inton 2028 national elections.
Iti maysa a press conference, inpetteng ti Senadora a nakasagana daytoy no isuna ti pilien ti United Opposition a kumandidato para iti kaalyadona a grupo.
Mainaig iti daytoy, nagyaman ni Hontiveros kadagiti inisiatibo ti Akbayan Partylist ken ti nagdumaduma a grupo ti pannakaisanyangkat ti programa nga addaan ti tema a “Risa Na!” kas paset iti panagsuportada iti posibilidad a panagtarayna.
Kunana a namnamaenna a makabukel ti grupoda ti panagkaykaysa sakbay a malpas daytoy a tawen wenno ti umuna a paset inton sumaruno a tawen tapno mapagtutulaganda no asino ti agbalin nga standard bearer-da.
Maipalagip nga immunan nga inrakurak ni Vice President Sara Duterte idi Pebrero 18 ita a tawen a gagemna a kumandidato kas Presidente para iti 2028 elections.
