LAOAG CITY – Inlawlawag ti maysa a Private Lawyer a ni Atty. Kidd Castro, Criminal Law Professor ti Northwestern University ti maipanggep iti Force Majeure.
Segun kenkuana, ti Force Majeure ket dagiti banag wenno pasamak a saan a makontrol ti tao kas ti gingined, bagyo, layus, gubat ken dadduma pay basar iti nakailanad iti Article 1174 Civil Code.
Inbatadna a ti Force Majeure ket maipatungpal no makaapektar iti responsibilidad ti maysa nga indibidual wenno grupo ti tattao kas idi kangitingitan ti pandemia ti COVID-19 a kinasapulan iti pannakabalbaliw ti pannakaisayangkat ti regular session a nagbalin a remote session babaen ti videoconferencing.
Maipalagip a kinontra ni Senador Risa Hontiveros ti dinakamat ni Senador Robin Padilla mainaig iti panagusar ti “Force Majeure” a posible a pagibasaran tapno palubosan ti remote participation dagiti Senador kadagiti plenary sessions iti Senado.
Immuna iti daytoy, bimmara ti diskusion mainaig iti gakat a baliwan ti senate rules kalpasan a nag-walk out dagiti minority bloc idi Mayo 26 kalpasan ti maiyal-alisto a pannakaaprobar ti remote participation wenno online attendance dagiti Senador iti plenario.
