LAOAG CITY – Inbatad ni Atty. Kidd Castro a ti panangdisiplina ken panangtarigagay kadagiti ubbing wenno menor de edad ket obligasion ti nagannak.
Daytoy ket kalpasan ti napasamak a shooting incident iti maysa a pagdalan iti South Cotabato no sadinno a 3 ti natay a pakairamanan ti menor de edad a suspek ken nasugatan ti sumagmamano nga estudiante.
Segun ken ni Castro nga arigna ket naipagagayangen ti shooting incident kadagiti pagadalan a maam-amoan laeng manipud ballasiw-taaw.
Inlawlawagna a tallo dagiti mabalin a saludsod ti publiko a pakairamanan ti criminal liability ti agtawen 16 a menor de edad, no kasanona a naala ti paltog manipud iti vault, ken ti pagsungbatan ti amana nga akin kukua ti paltog ken empleado pay ti lokal a gobierno.
Kunana nga adu dagiti paglintegan ti pagilian a mabalin a pagsungbatan ti suspek ken ti amana no sadinno a saan pay a masinunuo ti rason no apay naaramid daytoy ti suspek.
Impetteng ni Castro nga uray adda dagiti linteg ken adda dagiti mangisursuro a mangbayabay kadagiti ubbing ket dakdakkel latta ti akem dagiti nagannak.
Innayonna nga ado dagiti wagas tapno madisiplinaan dagiti annak no sadinno a nagannak laeng ti adda karebbenganna a mangaramid.
Kabayatanna, kunana a saan koma nga ipaima dagiti nagannak kadagiti mangisursuro ti panangdisiplina kadagiti annak ken kasapulan a no adda dagiti saan nga umno nga araramiden dagiti dagitoy iti pagadalan ket rumbeng laeng a sumango tapno makipagdengngeg ken saan laeng a dagiti nagannak tapno mautob ti anak ti saan a nasayaat nga aramidna.
