LAOAG CITY – Nangipila ti reklamo ti tallo nga hues ti International Criminal Court kontra ken ni United States President Donald Trump ken ti administrasionna mainaig kadagiti pannusa nga inpataw kadakuada iti napalabas a tawen.
Inpetteng dagiti nasao nga hues a dagiti addang ket maikanniwas iti paglintegan.
Iti kaso nga inpila iti federal court iti Manhattan, inbatad dagiti hues nga isuda Kimberly Prost ti Canada, Solomy Balungi Bossa ti Uganda ken Reine Adelaide Sophie Alapini-Gansou ti Benin a dagiti pannusa ket naaramid tapno mangiwayat ti extrajudicial pressure nga addaan ti gagem a dusaen ken piliten dagitoy.
Mainaig iti daytoy, saan nga insigida a nangipaay ti komento ti State and Treasury departments ken ti White House maipanggep iti daytoy a banag.
Maipalagip a nangipataw ti pannusa ti administrasion ni Trump kadagiti sumagmamano nga hues iti International Criminal Court iti napalabas a tawen iti maysa a saan pay a napasamak a panagibales iti panangiparuk-at ti war tribunal ti warrant ti panangarestar para iti Prime Minister ti Israel a ni Benjamin Netanyahu ken maysa a desision a manglukat ti maysa a kaso iti maipagarup a krimen iti gubat dagiti tropa ti Estados Unidos ken Afghanistan.
