LAOAG CITY – Kumpiansa ti Bureau of Internal Revenue (BIR) a maibalud dagiti naawagan a “BGC Boys” kalpasan nga inrekomendar ti Department of justice (DOJ) ti panangipila ti 44 a kaso kriminal mainaig iti maipagarup a P1.68 billion tax liabilities.
Ti dati a tallo a Department of Public Works and Highways (DPWH) – Bulacan engineer a da Henry Alcantara, Brice Hernandez ken Jaypee Mendoza ti nadakamat a naawagan kas “BGC Boys” a sumangsango ti 44 a kaso a tax evasion.
Karaman iti nairekomendar a reklamo ti 18 a kaso kontra ken ni Alcantara a maipagarup nga addaan ti sumurok P913 milyon a tax liability, 10 a kaso kontra ken ni Hernandez nga addaan ti sumurok P593 milyon idinto a 16 met a kaso kontra ken ni Mendoza nga addaan ti sumurok P179 milyon.
Kabayatanna, da Hernandez ken Mendoza ket manarimaan a nakabalud mainaig iti nagsina a kaso mainaig iti maipagarup P92.8 million “ghost” flood control project iti Bulacan idinto a ni Alcantara ket naikkat kas respondent iti nadakamat a kaso kalpasan a nagtestigo daytoy a rason ti pannakaikabilna iti Witness Protection Program.
