LAOAG CITY – Inpakaammo ti Sangguniang Panlungsod Member Kichel Pungtilan, a naaprubaranen ti dua a gakat nga inlungalongna iti siudad ti Batac.
Inlawlawaga nga umuna ditoy ti Emergency Shelter no sadinno a mangipaayda ti assistance kadagiti naapektaran ti kalamidad wenno didigra.
Kunana a ti pannakadeterminar ket iti babaen ti damage assessment form a makita no mano ti balor ti cash grant wenno estimated cost to repair no sadinno a ma-assess ditoy no sinno ti maka-avail.
No malpas ti assessment form, maiyawat daytoy ti City Social Welfare and Development Office (CSWDO), City Disaster Risk Reduction Management Office (CDRRMO), Engineering Office, City Building Officials, Barangay Unit ken no adda ti uram ket pakairamanan pay ti Bureau of Fire Protection (BFP).
Segun kenkuana, adda ti bracket ti cash grants no maaprobran no sadinno nga adda ti Php30,000, ti sumaruno a bracket ket agbalor ti Php40,000 agingga Php30,999.99 a daytoy ket manipud ti 5% calamity fund ti siudad nga agdagup ti P1M.
Mainaig iti daytoy, kunana a daytoy a tulong ket mabalin para iti amin a residente ti nasao a siudad.
Malaksid iti daytoy, kunana a nailungalong pay ti Anti-Limos no sadinnno a maiparit ti agdawat ti kuarta kangrunaan dagiti Badjao.
Inlawlawagna a ti katulonganda kadaytoy ket dagiti Enforcement Authority, Philippine National Police (PNP), wenno Barangay Government Unit.
No adda matiliwan ket maikabil iti City Social Welfare and Development Office (CSWDO) profiling tapno makita ti kinasiasinno dagiti agdawdawat ti kuarta.
Kabayatanna, maragsakan ni Pungtilan gapu ti agtultuloy a pannakaabrubar dagiti gakat para iti pagsayaatan dagiti umili iti siudad ti Batac.
