LAOAG CITY – Immuli ti dua nga indibidual iti tuktok ti spire ti Empire State Building iti New York City tapno ag-unfurl ti maysa a dakkel a banner nga agpanpanawagan para iti sangalubongan a kinakappia a saan a nagbayag ket nagtungpal a marriage proposal.
Nakasuot ti sleeveless black outfits ti dua kabayatan a nakaiggem iti antenna spire ti nalatak a pasdek nga asideg iti nalabbaga a silaw iti tuktok daytoy nga adda ti kangatona a sumurok-kumurang 1,454 a kadapan wenno 443 a metro manipud iti kalsada ti Midtown Manhattan.
Iggemda ti maysa a nangisit a banner nga addaan ti puraw nga all-capital letters a nakasurat ti “When the power of love beats the love of power the world knows peace.”
Saan pay a masinunuo dagiti otoridad ti pakabigbigan dagiti indibidual wenno kasano a nakadanon dagitoy iti nasao a paset ti pasdek.
Naammoan nga agarup 12:30 ti malem, nagin-inayadda a bimmaba iti nababbaba a paset ti antenna structure no sadinno a basar iti aerial video, maysa kadakuada ti nagparintumeng nga arig nagtungpal a marriage proposal sakbay a naginnarakup ken nagbinnisong dagitoy.
Basar iti pannakangiwat ti New York Police Department (NYPD), agtultuloy nga am-ammoenda ti insidente ken awan pay ti nayon a detalye iti agdama.
