LAOAG CITY – Inpetteng ni Senate President Sherwin Gatchalian nga isuna latta ti agserbi a presiding officer ti impeachment court iti panangusig ken ni Vice President Sara Duterte.
Inbatad ni Gatchalian a nalawag iti pagannurotan ti Senado a ti Senate President ti nasken a mangidaulo iti impeachment trial maiyallubog iti maipatpatungpal a pagalagadan ti Senado.
Iti agdama, kuna ni Gatchalian nga awan pay ti nagbalin a desision ti Senado a baliwan ti agbalin a presiding officer isut gapuna nga isuna ti naikeddeng a mangidaulo iti impeachment court.
Nupay kasta, inlawlawagna a mabalin pay a mangdutok wenno agelektar ti dadduma pay presiding officer no daytoy ti kalikagum ti mayorya dagiti senador.
Kabayatanna, idi nasaludsod no kasapulanna kadi ti abugado iti abayna kabayatan a mangidadaulo iti panangusig, kuna ni Gatchalian, saan daytoy a kasapulan imbes ti kapatgan ket ti naiget a panagsagsagana sakbay a mangrugi ti impeachment trial.
