LAOAG CITY – Inawagan ti maysa a nangato nga opisial ti administrasion Trump a paset laeng ti “messy democracy” ken karebbengan a nawaya nga agsarita ti nagbalin a martsa ti white supremacist group a Patriot Front iti Washington, D.C. kagiddan ti pannakaselebrar ti maika-250 nga anibersario ti panagwaywayas ti Estados Unidos.
Inbatad ni United States Interior Secretary Doug Burgum a nupay saan daytoy nga umannugot iti pammati ti grupo, protprotektaran ti Konstitusion ti Amerika ti karebbengan dagiti umili a nawaya a mangipeksa ti kaririknada.
Inpettengna a paset daytoy ti demokrasia iti pagilian.
Ginasgasut a nakamaskara a miembro ti Patriot Front ti nagmartsa iti kabisera kagiddan ti panangiggemda kadagiti bandera ti Estados Unidos ken Confederate flags.
Basar iti pulisia, naannayas a naglippas ti martsa ken awan ti nairekord nga insidente ti kinaranggas.
Nupay kasta, kinondenar ti sumagmamano a grupo ti nasao a martsa gapu iti pannakainaig ti Patriot Front iti white nationalist ideology.
