LAOAG CITY – Nagpangta ni United States President Donald Trump a mangiwayat ti naig-iget a panangatake kontra iti Iran, sumagmamano nga oras kalpasan ti panangirakurakna a nalpasen ti maipatpatungpal a ceasefire iti nagbaetan ti dua a pagilian.
Iti panagatendarna iti North Atlantic Treaty Organization summit idiay Turkey, inbatad ni Trump nga idadauloan dagiti dakes ken “sick people” ti Iran.
Inlawlawagna nga uray agtultuloy pay ti negosasion iti nagbaetan ti dua a pagilian ket awan latta ti serserbina.
Kas sungbat, kuna ti maysa nga opisial ti Iran a dagiti rakurak ni Trump ket mangidurduron iti rehion iti nakarkaro a riribok.
Nagballaag daytoy a nakasagana dagiti kaalyado nga armado a grupo ti Iran iti Middle East nga agtignay iti aniaman nga oras.
Ad-adda pay a kimmaro ti tension kalpasan a nagsinnukat ti panangatake ti Estados Unidos ken Iran.
Kabayatanna, inrakurak ti Iran a target-da dagiti pasilidad militar ti Estados Unidos iti Bahrain ken Kuwait kas panagibales kadagiti iwaywayat a panangatake.
Naammoan a dagiti strike ti Amerika ket naiwayat kalpasan ti panangatake iti tallo nga oil tanker iti Strait of Hormuz, maysa kadagiti kapatgan a ruta a pagang-angkatan ti langis iti intero a lubong.
