LAOAG CITY – Agtultuloy latta a bimmaba iti lebel ti danum ti Angat Dam iti baet ti panagtudo ti napigsa gapu iti Bagyo Inday ken habagat.
Ti Angat Dam ket ti umuna a pagal-alaan ti mainum a danum iti Metro Manila ken agsuplay ti padanum iti sumurok-kumurang 25,000 nga ektaria a pagtalonan iti Bulacan ken Pampanga.
Bimmaba iti kritikal a lebel ti danum iti dam idi Hulio 7 ken agtultuloy a nababa iti lebelna ngem iti nairekord a kababaan a lebel ti danum idi Hulio 18, 2010.
Gapu iti daytoy, kinissayan ti National Waters Resources Board ti alokasion ti danum para iti Metro Manila.
Temporario nga insardeng dagiti operator ti dam ti suplay ti padanum kadagiti pagtalonan iti Central Luzon tapno mataginayon ti nabati a danum iti reservoir.
