LAOAG CITY – Nagselebrar ti naruay a football fans ti defending champion nga Argentina kalpasan a nakastrek iti FIFA World Cup Final.
Segun ken ni Bombo International News Correspondent Jocelyn Umali – Moschini, saan a mailadawan ti kinaragsak dagiti tattao iti Argentina no sadinno nga adu kadakuada ti agrarambak kadagiti parke ken plaza kagiddan ti pannakaisayangkat ti fireworks display.
Inpettengna a nagbalin a naisangsangayan ti panangabak ti Argentina gapu ta nakaiserrek pay laeng ti dua a goal kontra iti England iti baet ti nabatbati a 10 a minuto.
Inbatadna a tunggal adda ti laban ti Argentina ket nakasubaybay ken supsuportaran dagiti Pilipino manipud iti rugi agingga iti maudi a laban ti ay-ayam daytoy.
Inlawlawagna nga inpakita ti Team Argentina ti panagtitinnulongda kas maysa a grupo malaksid laeng ti individual performance dagitoy.
Kunana nga admitaren ti Argentina nga amin a laban ket narigat para kadakuada ngem saanda a mapukawan ti namnama agingga a magun-od ti panagballigi.
Innayonna a no bilang mangabak ti Argentina ita a tawen ket daytoyen ti maikapat a kampeonato ti nasao a pagilian iti FIFA World Cup.
