LAOAG CITY – Nangabak ti Spain kontra iti Argentina iti score a 1-0 iti extra-time iti FIFA World Cup final.
Nangipatungpal ti tallo a panagbalbaliw iti starting lineup-da ti Argentina para iti FIFA World Cup final kontra iti Spain idinto a nagtalinaed a saan a binaliwan ti Spanish squad ti immuna a 11 nga umaayamda.
Insubli ni Argentina Head Coach Lionel Scaloni da Rodrigo De Paul, Gonzalo Montiel ken Nicolas Gonzalez iti starting lineup kasukat da Giuliano Simeone, Nahuel Molina ken Leandro Paredes.
Nagtalinaed a koponan ni Lionel Messi iti kalikagum a mailaban ti FIFA World Cup title.
Naammoan nga awan ti binaliwan iti lineup ni Spain Head Coach Luis de la Fuente no sadinno a karaman latta iti starting eleven ni Lamine Yamal iti baet a nagsagaba ti sugat iti semifinal kontra iti France idinto a nagtalinaed met a reserba ni Pedri.
Mainaig iti daytoy, nag-perform da Madonna, Justin Bieber, Shakira ken BTS iti half-time show.
Kabayatanna, nagbalin a naiget ti seguridad iti MetLife Stadium no sadinno a nagatendar pay ni United States President Donald Trump iti nasao nga ay-ayam.
Immuna iti daytoy, nagbalin a nalinak ken natalna iti intero nga Espanya kabayatan ti championship iti FIFA World Cup 2026 a naglabanan ti Spain ken Argentina.
Inyarig ni Bombo International News Correspondent Maribel Rosal iti Spain, ti laban koma ni Manny Pacquiao iti boxing nga arig agsardeng amin ti trabaho ken operasion dagiti business establishments tapno makabuyada laeng.
Kunana nga idiay Spain ket arig nakatutuk amin a tattao iti championship iti ay-ayam a football ken adda ti naikeddeng a pagpustaan dagiti mangayat nga agpusta.
