LAOAG CITY – Nagkampeon ti Spain iti FIFA World Cup 2026 kontra iti Argentina iti score a 1-0.
Iti extra time a laban, ni Ferran Torres ti nakapuntos ti maymaysa a goal a nangabakanda iti La Roja ken nangpatibker iti maikadua a titulo iti pakasaritaan ti torneo.
Saan a nalappedan ti Argentina ti naiget nga opensa ti Spain kalpasan a na-red card ni Enzo Fernández iti stoppage time ti second half.
Ti pannakakissay ti maysa nga umaayam ket nangipaay ti dakkel a lamang iti Espanya agingga a makapuntosda iti nayon nga oras.
Malaksid iti kampeonato, nagun-od met ti Spain ti nagduduma a pammadayaw.
Ni Unai Simón ket pinadayawan ti Golden Glove kalpasan a nakairekord ti pito a shutouts, ni Rodri ket binigbig ti Golden Ball kas kalalaingan nga umaayam ti torneo ken ni Pau Cubarsí ket binigbig kas Best Young Player.
Daytoy ti maikadua a gundaway a naala ti Spain ti FIFA World Cup kagiddan ti umuna a panangabak idi 2010.
Iti daytoy a balligi, nagbalin nga umuna a pagilian ti Espanya nga iggemda ti men’s ken women’s World Cup titles.
Kabayatanna, napaay ti Argentina a maulit ti balligi idi 2022 ken saan a natungpal ti namnama nga agbalin a maikatlo a koponan iti pakasaritaan a makadepensa ti titulo.
