LAOAG CITY – Narugyanen ti pannakaiwayat ti serye ti simultaneous exercise kadagiti maibilang kas active threats kadagiti sumagmamano a pagadalan iti siudad ti Laoag.
Segun ken ni Ms. Imee Nicolas, Department of Education iti siudad ti Laoag, Project Development Officer 1 Youth formation a daytoy ket imunanan a napagtutulagan a maiwayat babaen ti panagbinnulig ti City Government of Laoag ken ti Department of Education iti metlaeng nadakamat a siudad.
Inbatadna a daytoy a drill ket adda pakainaiganna iti napasamak a pammaltog idi laeng kallabes iti maysa a pagadalan iti Tacloban City.
Idi laeng Martes, nangrugin a naisayangkat ti active shooting incident iti Ilocos Norte National High School no sadinno ket ti nagbalin a scenario ket adda dagiti simmrek nga armado a lallaki iti uneg ti padadalan nga agpaputok ti paltog.
Inpetteng ni Ms. Nicolas a ti inwayatda a drill ket nagusarda ti umno a paltog no sadinno ket dagiti nagpammarang a suspek ken biktima ket manipud iti kameng iti Philippine National Police nga addan ti pammalubos nga agiggem ti paltog.
Kabayatanna, malaksid iti naisayangkat nga active shooting drill ket planplanoenda pay ti pannakaiwayat ti bombing drill ken stabbing drill kadagiti dadduma pay a pagadalan inton sumaruno a lawas.
