LAOAG CITY – Saan pay a nakapili ni National Basketball Association superstar LeBron James ti koponan a pagakaranna.
Addan ti sumurok dua a lawas ti napalabas sipud idi naan-anay nga inbatina ti Los Angeles Lakers tapno sumrek iti free agency.
Iti umuna a public appearance-na sipud idi timmalaw iti Lakers, nasaludsod ken ni LeBron no addan ti napilina a koponan.
Nupay kasta, saanna daytoy a direkta a sinungbatan imbes ket nangipasimudaag isuna a dandanin a maammoan ti publiko ti desisionna.
Iti agdama, sumagmamano a National Basketball Association teams ti nangipeksan ti interesna a maala ti superstar pakairamanan ti Cleveland Cavaliers ken Miami Heat a dati a nagay-ayamannan ken naikabil iti National Basketball Association Finals.
Karaman pay kadagiti mangipakpakita ti interes ti Philadelphia 76ers, Golden State Warriors, Indiana Pacers ken dadduma pay.
Inkari met ti four-time champion a sadinnoman ti papananna, ikagumaanna nga ag-fit iti sistema ti nasao a koponan ken ipaay ti amin ti kabaelanna iti baet ti tawenna.
