LAOAG CITY – Pagam-amkan ita iti nalawlawa a rinnupak kalpasan ti pannakatay dagiti suldado ti Estados Unidos kadagiti panangatake ti Iran idiay Jordan ken Iraq.
Kinumpirmaran ti United States military a maysa kadagiti suldado ti natay iti panangatake ti Iran iti northern Iraq, maysa nga aldaw laeng kalpasan ti panangatake ti United States military base idiay Jordan a nakatayan ti dua a suldado nga Amerikano ken nagibati pay ti maysa a service member a mapukpukaw.
Basar iti Central Command (Centcom), maysa nga indibidual ti natay iti maysa a “controlled detonation of unexploded ordnance” manipud iti inwayat nga Iranian attack drone a nakasugatan ti maikadua a service member.
Iti inparuk-at nga update ti United States military, kinumpirmaranna a nabirokanda ti maysa a saan pay a nabigbig a bangkay kalpasan ti inwayat a search operation iti lugar ti panangatake idiay Jordan.
Iti agdama, agtultuloy ti examination process tapno maberipikar ti pakabigbigan ti bangkay.
Napasamak daytoy iti maikawalo nga aldaw ti kumarkaro pay a panangatake iti nagbaetan ti Amerika ken Iran.
Iti pakabuklan, umaboten iti 17 ti pakabuklan a bilang dagiti natay iti biang ti Amerika ken adda ti 50 nga indibidual ti napapatay idinto a sumurok 500 ti nasugatan idiay Iran iti agarup lima a bulan ti rinnupak.
